I don dey do dis my taxi driver work tipe tipe, and I sabi everyting wey dey inside am.

Na di work I do take marry Bose, and Bose come born two woman pikin – Bisi and Funke – for me. Di two both of dem don take JAMB. If no be dis Coro matter, dem for don dey prepare to enter Uniservity.

Na di taxi driver work I dey take give my family food and order tings wey dem need.

Na di work I dey take pay for dis Baba Braimoh face-me-I-face-you house wey I dey live with my family for Abule Egba.

Na di money I dey take maintain my guonguoro since before Biafra war. Na im make am dey sound like tear rubber and fly like jet fighter for expressway.

Na di work I dey do, use di money take “My Usual” and orisirisi pepper soup for Madam Shine Buka

wen my throat scratch me. Yes nau. Abi I no go settle mysef?

And na di work I dey do take settle all dose Lagos sisi dem wey no dey let di son of man rest – Sikiratu, Aisha, Jumoke, etc, etc., in dat order.

Upon all dis, I no dey take my family play. I no ever tink of to marry second wife, even dough e no be crime for my village for Ogbomoso to marry any number of wife wey you like.

Na im make I surprise wen my wife wake me up by 5 o’clock am in di morning yesterday. E say e get wetin e wan discus with me before I comot go our garage wey dey near Ikeja under bridge.

I tell am say weda di meeting no fit hold for night wen I come back, my wife say No. E say I go don tire wen I come back for night.

I tell am okay make e fire on.

Bose first talk say e sorry as e no dey do all di ting e suppose to dey do as my wife, make I understand say e don dey old, and woman body no be like man body.

I tell Bose say make e go straight to di point and stop dis corner corner talk. I ask am na wetin be dat ting wey e suppose to dey do for me wey e no dey do.

Bose say I no be small pikin wey go dey ask dat kind question. E say make I remember for night wen I wan touch am for bed but e shift comot.

Bose come talk say in short, to bring peace come for dis house and to make me happy, e wan marry new wife for me.

I come talk am for my mind say my wife Bose? Marry anoder wife for me? Abi I no hear am well?

Afraid come catch me. Tori Olorun!

(To be continued)

Make we jam again on Friday.

Tank you.

Tank you very much.

And tank you very, very much indeed.