Lagos no come be as I meet am dat time wen I come learn mecho work.

Una kukuma sabi how I take run comot for my village for Ogbomoso wenArike Papa wan take African Insurance finish me, say na me give im pikin belle wen we dey for Standard 5 for our village night school.

As I run come Lagos in 1965, I first learn mecho work, after my freedom, I begin do taxi driver work. And na dis same my guonguoro I drive since dat time till today - no leave, no transfer.

Dat time Lagos sweet, no be small. Gbomo gbomo and amu robber dey but e no dey too much.

Dat time noting like kidnapping, Boko Haram or Fulani kini kan. Peace dey gan. Na faaji we jus dey do, dey chop life dey go.

But now all di bad, bad ting dem don take over. Di one wey bad pass na dis Coro.

Now, to carry passenger sef, afraid dey catch me. And na so di Coro come dey increase everyday. Tori Olorun!

Di order day, I jus siddon dey tink am for our garage wey dey near Ikeja under bridge. Dem say Coro no get cure, so wetin di son of man go come do make di ting no catch am?

Na orisirisi passsenger we dey carry everyday for dis our work. How person go come sabi di passenger wey carry Coro, wen be say dem no dey write am for face?

Dem say make we dey use facemask, I dey use am, even double. Dem say make we dey use sanitiser, I dey nearly take am baf sef. Dem say make we no dey near person, I dey try.But e no easy to do dat one for Lagos, I swear! Lagos wey people full like sand sand?

Na im make I don dey tink weda make I go my village go find better agbo wey me and my family go dey drink to take shock dis Coro. Who tell dem say agbo no fit swallow dis Coro?

No be all dis fake Lagos agbo wey all dis wayo woman dem dey carry come sell for our garage o. I mean original agbo from Ogbomoso. Na dat one Oga Seyi drink nau, wey make Coro run 440.

Abi make I kukuma pack my load go back to my village?

I hear say dat wicked Arike Papa don peme, and Arike sef don born dat pikin tipe tipe, so nobody go disturb me again.

But I confuse. Shey make I go find agbo and come back, abi make I kuku pack go village? Abeg make una helep me put mouth for dis matter.

Make we jam again on Friday.

Tank you.

Tank you very much.

And tank you very, very much indeed.