I tank Eledumare say our union chairman Jimoh no win state council election dat time, if no be so hungry for finish am now.

After dat election, Jimoh jus dey come siddon for our garage wey near Ikeja under bridge, like person wey all im family don peme. E no dey gree talk to anybody, plus including me wey be im paddy paddy, as di akowe of our branch.

See Jimoh wey be say before dat election e no dey let me rest. If e no nack me tori how e carry one sisi like dat for im taxi go short time, e go tell me how e go become Baba Olowo di next day. But union politricks come show am pepper.

All di money, rice and garri wey e share for everybody for all di taxi garage wey dey for Lagos before di election, everyting vamus. E even sell im taxi to take campaign.

If you see Jimoh after dat election, e resemble person weycapture AIDS. I do everyting to make Jimohget im body back, na lie.

I talk am for my mind dat time say na im good for Jimoh. I been tell am say if e no fit be chairman for our state council, make e manage di branch chairman wey e be. Afterall chairman na chairman.

Di ting wey Jimoh no know be say na Eledumare save am make e no win dat election. Orderwise, e for see imsef for real mess – public one!

Na di ting wey happen last month for di state council of our union make me talk dis ting. See as National come sack everybody for our state council.

Wetin Jimoh for dey chop now? Who tell am say to say na im win for dat election, Oga patapata for Lagos for form one big committee to oversee all di motor park wey dey for Lagos and make am di chairman? Which settlement pass dat one? Who dash Jimoh dat kind power?

Na im make oyibo dey talk am say, all animal na equal but some dey more equal dan di orders… like Jimoh andMC Oluomo .

Make we jam again on Tuesday.

Tank you.

Tank you very much.

And tank you very, very much indeed.

•Credit: Matilda’s Blog.