I no sabi before say blood and Coke dey compete for market. Wen I dey hear tele tele say some people dey sell dia own blood, I dey tink say dose people don craze. True, I no know say after white powder, na blood dey follow am for market.

If you reach hospital see di number of bobo dem wey line up to sell dia blood every day, afraid must to catch you. I swear!

Na di ting wey happen di order day wey make me see dis America-wonder.

Dat Saturday, I say make I rest small for house before I carry my guonguoro enter road.

No be everyday man pikin go dey for road 24/7, and body no be wood..

Me, Bose and Funke dey for palour dey watch one program like dat for TV. Small time, I notice say Bisi no dey dia. Bisi wey be say if you put food and film say make e take one, e go take leg match di food den carry di film go.

I use style go outside, I no see am. I go kitchen, e no dey dia. As I say make I turn di order side take style go check toilet, na im I jus dey hear Hmm! Hmm! Hmm! like dog wey wan born pikin.

I follow di noise go, come see Bisi dey vomit for backyard. I come begin shout for im head say Eledumare don catch am today, say e don go chop di one wey big pass am. I say if e no tell me di person wey do am, I go take matchet commot im head today today.

Bisi dey say abeg Daddy, Daddy abeg. I tell am say, make e put im mouth for shut up kia kia. I tell am say if im name don turn to Ebele, me sef go Bianca am now, now, now! Shioorr!

I tell Bisi say, di only ting wey I wan hear for im mouth now na make e tell me who do di ting.

Bisi come waste time. Instead, e still dey tell me Daddy abeg, Daddy abeg.

Na so I give am for face ppossaarrhh! Bisi jus fall down for ground. I wan move inside house go bring my matchet, na im person hold me. Everybody for our compound come dey beg me.

Una kukuma trust all dis face-me-I-face-you house, say small ting happen like dis, everybody don come out.

Di next ting be say, I carry Bisi put for inside my guonguoro, begin dey go General Hospital for Ikeja.

Quick, quick, dem carry am go inside. Dem say make I wait for corridor. Small time doctor come out, squeeze im face, shake im head, den begin look me for face. I nearly piss for my shokoto trouser. Wetin happen to my pikin? Na so my body come dey shake like Shakespear. Tori Olorun!

Small time di doctor come tell me say na food poison dey worry my pikin and e go need blood. I ask am for wia I go see di blood. Di doctor say if I don ready make I enter make dem take my blood, since na me be di Papa. I say no troublem.

I tink say na for di small chechere tube wey dem dey take blood sample o. But wen di doctor say na di size of pure water bag dem wan, my broda, I come calm down like say dem pour me ice water. Olorun Oba o!

Before I turn my face sef, 10 hefty bobo dem don appear. Dem say if na blood I wan, dem ready to donate, even if na one drum I wan.

I look dem ti-ti-ti-ti. Some be like people wey never see food chop since last year. I come talk am for my mind say no be my pikin una go give dat kind una blood. One bobo sef resemble amu robber. I say anybody wey dat kind blood enter im body, go jus become kidnapper or bandit one time.

Small time, di doctor come out, e say weda I don ready with my blood. Doctor say if I no do quick, any ting fit happen to my pikin.

Quick, quick, I carry one of di hefty bobo go one corner and talk.

But I tank Eledumare say di money wey I pay for di blood no loss. My pikin don well and im body strong kakaraka.

Make we jam again on Wednesday.

Tank you.

Tank you very much.

And tank you very, very much indeed.

•Source: Matilda”s Blog