Dis life no be as people tink am. Na only Eledumare sabi everyting for dis world.

You fit tink say person own don finish, but you go surprise say tomorrow na im everybody go dey call “Oga mi sir”. Olopa sef go dey tanda for attention and salute am say “Tion sir, all corrupt sir!”

Up till yesterday yesterday morning, any passenger wey I carry, go dey talk say Chairman own don finish. I dey tink say who be dis Chairman wey everybody jus dey talk about?

One madam wey I carry for drop go Ojodu Berger own na im make me begin laugh. Di madam curse Chairman tire. Tori Olorun!

As e enter my guonguoro for our garage wey dey near Ikeja under bridge, na im di madam begin dey curse Chairman.

E say na God catch dat yeye Chairman. E say na im be Woman Leader for im Ward for di same party wey Chairman dey . But any time wey e go to meet Chairman for Abuja make e give am small contract, Chairman no go gree see am.

E say di last time, e siddon for Abuja for one week make e see Chairman. But every day, Chairman go say make im PA tell am say Chairman dey for meeting.

Di madam say if no be say e do small part time ashawo for Abuja, e no for see transport money take come back Lagos.

Till I drop am for Ojodu Berger, di madam jus dey pour curse for Chairman head. E say e go do tanksgiving for church on Sunday becos say dem don sack di yeye Chairman wey make am go dey do part time ashawo for Abuja make e get transport money come back Lagos.

Anoder passenger wey I carry for drop go Maza Maza yesterday afternoon come dey happy well well. I hear am wen e call somebody for phone dey tell am say all di people wey plot coup for Chairman don fail. I come dey tink weda na di same Chairman wey dat madam dey curse for morning dis bobo dey talk about.

Di bobo come dey tell im friend for phone say all di enemy of Chairman don shame. E say wen wahala too much, na im Chairman run go meet Baba for London.

E say na for London Chairman and Baba finish di matter. E say Baba tell Chairman say make e no mind all dose yeye people, make e jus go back and do im Chairman work. Olorun Oba o!

Di bobo even tell im friend for phone say no be only Chairman carry im matter go meet Baba for London o. Di bobo begin mention dia name one by one.

I say shiooorr! Who be dis Baba for London sef? Shey na Babalawo abi na Baba Aladura? Di bobo jus dey say Baba, Baba, Baba, na who be dis Baba?

Well, if na to go meet Baba for London all matter go settle, na im be say me sef go carry all my wahala go meet dat Baba for London. Abi how una see am?

Make we jam again on Tuesday.

Tank you

Tank you very much

And tank you very, very much indeed.

•Credit: Matilda’s Blog