Dis oyibo Russia and Ukraine wahala wey I dey hear upandan so dey turn my belle. I swear!

No be becos say di two both of dem dey fight o. Wetin concern me. But na wetin dey happen to our Naija people wey dey dia, especially our pikin dem wey dey go school for dia, na im concern me.

I hear say all order contry for dis world don carry dia people comot for Ukraine, na only Naija people remain. Haba!

I no even know wetin dey happen until yesterday wen I carry two bobo like dat for drop go Dopemu.

Since di time dis two bobo enter my guonguoro, na so so oyibo Russia and Ukraine fight tori dem dey nack.

Small time dem come use dia phone dey play di video wey Naija school pikin dem dey cry,, dey talk.

Dem put di school pikin dem inside one room since morning, no food, no water. Dem say Naija embassy Oga tell dem make dem dey wait for bus wey go come carry dem cross Ukraine border, enter Poland. And na so dem don dey wait ti-ti-ti, dey look road, di danfo, abi na molue, no show face. Tori Olorun!

Wen I drop di two bobo dem for di place dem go for Dopemu, I beg dem make dem show me dat video wey dem watch inside my guonguoro.

Na so I begin cry wen I look di video finish. Why Naija gofmen go make our own pikin dem suffer like dis? Olorun Oba o!

As I dey drive dey go back, I come talk am for my mind say, if na ordinary to carry di school pikin dem cross border for gofmen bus, and di bus no gree show face, ehn, my guonguoro dey nau.

Everybody sabi say no place wey my guonguoro no fit enter. Di only ting na to service am well well and buy enough petrol wey go last me till I reach for Ukraine. By di time I carry di school pikin dem 10 batch, di matter don settle be dat.

But my only troublem now na di petrol wey no dey town. How we go come do am?

Well sha, if una come our garage wey dey near Ikeja under bridge and una no see me, make una know say I dey helep our gofmen do dia work for Ukraine with my guonguoro.

Make we jam again on Friday.

Tank you

Tank you very much

And tank you very, very much indeed.