If you see some people, you go tink say dem no fit harm ordinary fly sef. But na dose kind people sabi waka kerukere pass.

I been tink teletele say I sabi di character of all our union member dem well well.

Atlist, I know say our union chairman Jimoh, like to dey show say e get money too much. Na im make e marry seven wife and e rent house give dem one by one.

I no sure say Jimoh even sabi how many pikin e get.

Idowu, our union treasurer own be say, as im nyansh flat so like China man own, if e jus touch any sisi one time, na belle straight, and na twins di sisi go born.

Dat's why we dey call am Baba Ibeji. Idowu get twins full everywia for Lagos.

Emeka own be say, e ready to carry passenger from our garage wey dey near Ikeja under bridge, go drop for Obalende and collect N500 kpere. Emeka sabi spoil market for us, no be small.

Na im make plenty passenger dey always wan make Emeka carry dem. And di ting dey give am plenty money everyday pass we wey dey collect official union rate.

Akpan own na woman. Akpan dey like anyting wey wear skirt for body. If you use skirt cover stick, Akpan go chase dat stick, even wen e know well well say dat ting na stick, no be person.

One day I ask Akpan weda dem take woman curse am for im village before e come do taxi driver work for Lagos.

Mutiu nko? Dat one na igbo be im own - Wee wee! Any time you see Mutiu eye red like fire, make you know say e go don smoke like twenty raps of igbo. And if e drink monkey tail to take wash di igbo down, na so so smile Mutiu go dey smile even before you talk to am sef.

All of us been tink say Mutiu no dey near woman rarara.

Na so all of us complete for garage di order day becos of di union meeting wey we dey do every week.

As Jimoh jus tell Idowu make e use prayer close di meeting, na so one sisi like dat jump enter our garage. Di sisi rush enter our meeting.

If you see wetin dis sisi wear for body, afraid must to catch you.

Di wig for im head don fall go one side. Di jeans skirt e wear na super mini, e no fit bend down small sef becos if e try am, everybody go see everyting wey dey for yonder.

Di blouse e wear nko? E for better make e no wear anyting sef. Di blouse be like plain glass, everyting for di sisi body jus show, and na so di two pawpaw wey dey im chest jus dey dance konkoma as di sisi dey waka.

If you see di sisi, you go jus know say dis one na ashewo wey go don collect long service award.

As di sisi jus enter our meeting place, e hold Mutiu for shokoto trouser and begin shout.

(To be continued)

Make we jam again on Friday.

Tank you

Tank you very much

And tank you very, very much indeed.