Abami Eda don sing am teletele say, “Wen cat sleep, rat go bite im tell, na wetin e dey find? Na palava e dey find. And na palava e go get”. Dat song na true. I swear!

Shebi una remember last week wen I talk say vacancy dey, say I wan marry new wife? My broda, I no know say I don cause serious palava for mysef.

I hear nwi dat day wey I say make all di candidate for new wife bring dia application come meet me for our garage wey dey near Ikeja under bridge.

Before I reach garage dat morning, every wia don full sote our union member dem no see chance drive enter di garage. Me sef no see way drive my guonguoro enter. Applicant dem wey come for di new wife screening pass 1,000. Tori Olorun!

Come see orisirisi shape and size of nyansh and headlamp – small, medium, big, large, extra large, extra extra large, etc, etc.

As dem jus see me dey come in my guonguoro, na so dem rush me. I no know how dem take know my guonguoro.

Before I stop sef, dem don open my door. Four of dem jump inside passenger front seat, seven jump inside di back seat. And I never match brake o.

As I manage stop, di rest of dem don surround my guonguoro. No way for me to even open door and come out.

Di ones wey don jump inside, give me dia application. I no collect. I say make dem hold dia application first, say I wan collect everybody own at di same time.

Di one wey near me for front say na lie I talk. E say I must to marry am. Two for back say if I no gree to marry dem, na me and dem today. Dem say dem be twins and di two both of dem wan be my new wife.

Anoder wan tell me say e be graduate, and e don dey find work since 9 years wey e comot for uniservity, up till now e no see work. E say na im make e don decide to forgot about work and marry. And im lucky come shine wen e see di vacancy for new wife wey I talk last week. E say e no go lef me today lai lai.

Anoder wan talk say shebi I complain say my wife Bose no dey gree give me kini, e say if I marry am, everyting wey dey for im body na me get am, and e dey ready for me anytime of di day – morning, afternoon and night. And even if I wan lef di ting inside im kini till day break, e dey kampe. Olorun Oba o!

(To be continued)

Make we jam again on Friday.

Tank you

Tank you very much

And tank you very, very much indeed.