As di bobo tell me say I go pack my guonguoro face one direction wey be say, wen dem finish, dem go rush enter and I speed off immediately, someting come dey tell me someting inside my ear.

For dis Lagos o, noting wey we taxi driver never see. Na orisirisi passenger dem we dey carry everyday. So wen any passenger begin talk, we sabi wia e wan land.

If na ashewo, we know. If na gbomo gbomo, we know. If na Yahoo Yahoo, we know. If na ordinary tief sef wey dey pick pocket for bus stop, we know. Amu robber nko? We know.

Na im make, as di bobo mouth dey run tatatata like typewriter, I know wia e wan land. But I jus dey do like say I be mumu.

Wen e talk finish, I tell am say sebi e know say na night duty be dat. E say im know, but no be TDB. I tell am say weda TDB or no TDB, night na night, no be day time.

I wan use ogbonge price take discharge am, but I shock wen di bobo gree to pay. I come talk am for my mind say today na today. Di business wey dis bobo wan go do for Palmgrove for night with im boys get weight gan.

I gree with am say I go carry im boys go Palmgrove. I look time, na 2 O’clock pm in di afternoon. I ask am di time wen im boys go come meet me for garage. Di bobo point hand for di order side of di road near under bridge. I see there hefty bobo dem tanda dey look as me and dis bobo dey talk.

E come tell me say di boys dey ready. E say e go signal dem now make dem cross road come for garage. E say I go carry dem go one joint near Palmgrove wey we go wait till night before di operation start. Olorun Oba o!

I ask am what kind of operation, di bobo jus carry im shirt up small make I see di small gun wey e carry. Den e come use im fingers do sign of shooting gun ta ta ta. Tori Olorun!

See me, see amu robber dem. So, na me dem wan use as dia driver. Na im be say if I carry dem go for di operation, me sef I be amu robber.

But as e dey now, as dem don already tell me di kind business wey we wan go do, no how wey I go take comot my head. If I make any nonsense move now, dem go jus waste me one time.

Na so hot piss come begin worry me. I tell di bobo say make e signal im boys make dem cross road come enter my guonguoro for garage make we dey go kia kia.

(To be continued)

Make we jam again on Friday.

Tank you

Tank you very much

And tank you very, very much indeed.