Lagos don come sweet again, no be small.

Since Monday wey oga patapata release us for cage like hungry dogs, di son of man don dey count better money for hand.

Everyday, before I close go my house for Abule Egba, I dey carry like 7 passenger dem for drop and 3 for charter. Una sabi wetin dat one mean nau.

But di ting be say, di way plenty people dey do for Lagos road since dis week, afraid don dey catch me.

Upon say everybody dey hear say make we dey do social distance, cover face and use soap water wash our hand, some people no dey send.

Now, e be like say gofment don dey plan for wetin go happen from next week.

Yesterday, Jimoh our union chairman call all our union member dem for phone say anywia we dey, make we land for our garage wey dey near Ikeja under bridge. E say emergency meeting dey.

By 3 O’clock pm in di afternoon all of us don gather for garage for di meeting. Jimoh tell me say, as di akowe of di union, make I take minute.

I tell am say make e go on saun, say I dey hear everyting. Me I kukuma know say, wen I reach house, I go tell any of my two woman pikin – Bisi or Funke – make e dey write for me wetin I tell am. Wetin concern me concern plenty grammer? Wetin concern agbero with overload?

Jimoh first say make we welcome di visitor wey come our meeting. E say di man Na gofment official for Alausa. E say na Oga Sanwo-Olu send am make e come meet us for our garage.

Na so all of us stand up and clap for Mr Dauda Folorunsho a.k.a Mr. Dfol.

Mr Dfol come tell us say di way tings dey, dis Coro wey dey so go born plenty piikin for Lagos from next week becos of people wey no dey hear word.

E say plenty people jus dey behave anyhow, dem no wan do wetin gofment say make we do so dat dis Coro go vamus in time.

E say gofment dey prepare, na im make dem wan make we standby with our taxi.

Mr. Dfol come tell us say make we write down all our name and phone number and address. E say gofment fit call any of us anytime, even for midnight, for emergency work.

Idowu, our union treasurer, stand up and ask di type of emergency work. Mr. Dfol say na Coro emergency. He say becos gofment believe say Coro go plenty from next week and gofment no get plenty motor to begin rush di plenty Coro patient dem go for Coro center at di same time, na im make gofment wan make we taxi driver standby with our taxi.

E say gofment go pay us better money according to di number of Coro patient we carry. And gofment go dash us raincoat, rainboot, orisirisi face cover and soap water wey we go use make Coro no catch us.

I manage siddon make di meeting finish. As Mr. Dfol go finish, I tell our union member dem say, from tomorrow I no go dey house, infact, na dis night I wan travel sef.

Make we jam again on Tuesday.

Tank you.

Tank you very much.

And tank you very, very much indeed.

Update news