Na NELSON DAFE dey nck dis tori

Time don reach for Nigerians to sabi who dia minsters go be for di next four years.

Senate president Godswill Akpabio dey expected to read out di names of ministers wey di Presidency don submit to di National Assembly.

But one of di Ministerial position wey many dey wait to sabi na dat of petroleum.

Dis na sake of say ministry of petroleum na one ogbonge office wey dey determine plenti tins for kontri economy.

Since president Bola Tinubu enter office for 29 May, 2023 plenti tok-tok don dey surround Nigeria oil industry.

Tinubu for im first presidential speech bin announce say fuel subsidy no dey again.

Di announcement meet Nigerians wit plenti kwesions as dem no sure how e go be.

Petrol price na major tin wey dey determine di economy for many kontris especially for Africa largest economy.

Wetin neva clear na whether president Tinubu go announce imself as di petroleum minster like some former presidents – Tinubu get experience for di oil sector.

E fit do like General Abdusalami Abubakar, President Olusegun Obasanjo, and President Muhammadu Buhari wey bin function as petroleum minsters wen dem dey power.

Or make e appoint anoda pesin to dey in charge di way former president Goodluck Jonathan do.

However im do am, anybody wey later show as di petroleum minister get plenti work to do.

Di reason na sake of how di Industry don become over di years: refineries wey no dey work, fuel subsidy gbege, crude oil theft, illegal refineries, among odas.

Di Federal Ministry of Petroleum Resources na part of ministries wey dey incharge of petroleum resources and dia activities for Nigeria.

Former President Muhammadu Buhari, e bin make imself di minister of petroleum

Oga Buhari during im first tenure bin appoint Dr Emmanuel Ibe Kachikwu as Minister of State and Petroleum Resources for November 2015.

Kachikwu bin also serve as chief executive of NNPC Muhammadu Buhari.

Kachikwu replacement na Timipre Sylva wey bin take over di oil Minister portfolio for August 2019 for Buhari second term.

During im time as minister, Nigeria oil output bin fall to im lowest inside plenti years. Dis na sake of crude theft and pipeline vandalism, according to goment.

Sylva bin announce im resignation as minister of state for Petroleum for March 2023 to join race for di Bayelsa governorship election.

Update news