Na NELSON DAFE AKPOMUVI dey report so

One businessman wey tanda as witness for di case of Chrisland School girl Whitney Adeniran wey happun for Ogba magistrate court for Lagos on Monday tell di court say she no die by electrocution.

Ajayi Smart wey bin dey di stadium premises wen di incident happun tok say e witness as di pikin fall for ground on February 9 dis year, wen di school dey do inter-house sports for Agege Stadium.

For one cross examination before Justice Oyenike Fajana, wey last for some hours, 44 years old Smart answer kwesions from different counsels wey get hand for di case.

Im serve as witness for di Ice cream vendor wey dem accuse say get hand for di death of di school girl, wen di incident happun for Agege.

Di witness wey tell di corona inquest say im dey do small scale supply business to companies say e bin see some machines wey look like wetin dem dey take produce chin chin or oda kind chop-chop snacks for di scene but add say di machines no dey work at di time wey di accident happun.

Oga Smart say e dey always go Agege stadium from Iju Isaga area of Lagos to do exercise by 6:00am-8:00am.

Afta im excercise e go stay dia for some time to watch oda pipo activities like basketball and odas bifo e go back im house, e bin tell di family counsel for cross examination.

“Di day wen di incident happun, I bin dey come out from di convinience wen I see one girl fall down few metres away from wia I dey, den I see some mature pipo wey rush to her side to helep her, Smart tok as dey answer kwesion from di witness box.”

E say e bin also ask anoda pupil wey dey around di scence wen di deceased fall say wetin do di girl and dat one too say she fall, e further tok.

Oga smart wey say im bi businessman also add say pipo bin try take di school girl to di back of di building wia she fall bifo one white bus come to helep carry her away.

her group so dem sabi wetin to do.

Di court later show di victim some fotos wey dem snap for di scene of di incident weda im fit sabi di place wia di late school girl bin fall.

Oga Smart afta e look all di pictures explain again wetin im bin see for Agege Stadium for 9 February during di Chrisland school Inter-house sport wen one of dia pupil fall around di time wen odas dey do march past.

Di Magistrate bin adjourn di case till 22nd June , wen oda witnesses go show for court.

Tori about di Chrisland school girl bin start to trend for February 11 afta her mama post for social media say her pikin die during di school Inter-house sport wey shele for 9 February 2023.

She claim say di school authority dey try cover up di mata and refuse to speak on di cause of death.

Father of di deceased, Dr. Michael Adeniran, also claim say dia daughter ''die from naked wire from one cotton candy vendor machine afta she touch am.

“And she dey electrocuted immediately she lean on am,” e tok.

Di school management deny di allegations as dem say di student bin slump for “public view” during di competition wey she no participate in, sake of her ill health.

Dr. Adeniran tell BBC Pidgin say im believe say di school no dey give di true account of wetin happun to dia daughter.

Di state govment bin order di closure of Chrisland School for Opebi-Ikeja on 13 February afta di death of Whitney Adeniran.

Authorities of Lagos State goment also charge Chrisland High School, some members of staff wit offences of “involuntary manslaughter, reckless and negligent acts”.

Whitney death happun on 9 February 2023, she slump during di sport event and doctors for Agege Central Hospital declare her dead on arrival.

Lagos State Director of Public Prosecutions also charge one of di vendors of di event wit di same offence.

Di case still dey kontinu for court as authority dey try gada informate and tok to witnesses under oath.

Court also dey try put togeda forensic reports plus oda tins wey involve for di matter bifor dem go give final judgement.

Update news