Na NELSON DAFE dey nack dis tori

Nigerians dey vex,some dey laff as APC presidential candidate Ahmed Bola Tinubu no gree ansa kwestions from tori pipu and oda pipul dem for one intavue wey he go for Chatham House for London. Pipul been expect say he go tell di world by himsef how he go take solve Nigeria problem.

He don tey wey Tinubu dey avoid tori pipul for Naija since he win di APC presidential tiket, insted he go say make some of him men go dey represent am.

He don still refuse to attend any presidential election debate or town Hall meeting wey dem dey organize fir candidates.

So when Tinubu come appear for Chatham House for London,where many big leaders dey for share ideas, many pipul come tink say last last dem go hear Tinubu yan ans ok wetin he go do as president of Nigeria.

How he wan take solve security problem for Naija o, how he wan help make sure say job dey for Naija pipul o, how he wan take stop pipul make dem.no dey thief awa oil for Naija Delta o. All dis kwestion na e tori pipul ask am o. But pipul suprise wey Tinubu say make him pipul for he campaign team help am dey ansa.kwestion. Chaii.

One PDP tori person say Tinubu run leave him.responsibility. Oda pipul say wetin Tinubu do so show say he no well reach and he no get enof idea to lead Nigeria.

But one of Tinubu men wey help am ansa one of di kwestion, Dele Alake, say dos wey dey yab Tinubu no know wetin be leadership.

“Tinubu wan show say he get pipul for he team wey get idea well well,” na so Alake yan.

Tinubu ansa some.kwestion himsef sha wey consan him age and work history.

He say him na 70 years and na March 1952 dem born am. He say he go Chicago State Universiti and him work for one company wey dem dey call Deloitte.

Update news