Na NELSON DAFE dey nack dis tori

Pipul dey paro for Naija becos dem arest one universiti student and now dem don carry am go court say he wan spoil first lady Aisha Buhari name for Twitter.

Govment pipul wey carry am go court so say Aminu Adamu Mohammed post picture of Buhari wife for Twitter come tok wit Hausa language say she dey thief Nigeria money.

Di govment pipul say di boy wey be 23 years old dey spread wrong information.

Di boy loya come yan say di boy tell court say he no do anytin bad.

Na dis Monday wey dey come so na e di boy be wan start him final year exam o.

Now person no know weda he go still fit rite him exam on Monday as dem hol am so.

He loya Chijioke Kingsley Agu say him don tell court make dem let dem bail am and say he pray say di court go treat di mata before 2 days go pass.

Mr. Mohammed parents been don beg Mrs. Buhari say make she forgive dia pikin but she neva yan come aut for di mata.

Na early dis month dem say dem arest Mohammed but na dis Tuesday so na him dem bring am come court.

Di govmwnt loya say wetin di boy tok for Hausa mean say "mama don chop poor pipul money".

If court say di boy dey gilty dem fit sentens am reach 2 years for prizin o.

Na Environmental Management na di boy dey study for Fedral univesiti for Jigawa. Him classmates dem say di guy know book well well.

Pipul for soshia media and human rites pipul say govment no do well for dis mata. Dem say make dem release di boy sharp sharp.

Some pipul say naija govment don dey fear as dem dey yab dem.

For early November na so dem fine 2 young students and come flog dem for public afta court for Kano say dem wan spoil di name of Kano govno.

Update news