Na NELSON DAFE dey nack dis tori

Futbol fans for Nigeria dey praise France ataka Kylian Mbappe no be small afta he score two goals for France wey dem dey beat Denmark for di Qatar 2022 world cup wey dem dey play so.

Afta dem. Beat Australia 4-1 for dia first match France come need win against Denmark to quolifai for di next raund for dia group.

Denmark hold graund for first half. Dem no gree for France. But di match come catch fire for second half.

Mbappe score for France for 65 minit. He just show say he get sense as he compose himsef put di bol for net.

But France lead no last as Andreas Chritiensen head di bol put for France net for 68 minit to make am 1-1.

He come be like say Denmark go see drow for di match but Mbappe no gree o. Na so he just run put for cross for dying minits coke use him lap take nack di ball enta gol. France playas and coach hapi no be small as dem win di match.

Afta di match, fans for sosial media begin praise Mbappe well well and some say he beta pass Man City ataka Erling Haaland wey some pipul feel say na him be di best strika for di world.

One fan say if he need to chose one ataka for dem 2 na Mbappe o.

Anoda fan say: “France really impress me. Mbappe dey hot o.”

“Haaland fit be beta scora o becos he dey score some goals wey no easy to score. But Mbappe play bol pass am,” na so one fan yan.

“Some pipul desiv demsef dey say Haaland play bol pass Mbappe. I just dey laff,” na so anoda fan yan.

One come still tok say: “Dem don disrespect Mbappe for long. Na him be di only person wey dey carry e team waka so.”

If Mbappe come English league, one fan say he go shine pass Haaland wella.

“I just wish say Rashford good like Mbappe,” na so one fan wey be like Man U fan yan.

Update news