Na NELSON DAFE dey nack dis tori

Portugal go get full support for dia Estadio Jose Alvalade stadium when dem go jam Naija Super Eagles on Thursday evening for di big frendli match wey dem go play.

Portugal futbol oga dem release information say dem don sell all di ticket finish for di match o. Na Portugal last frendli match e be before dia team go move go Qatar for di 2022 World Cup.

Portugal futbol oga dem yan say na full support Portugal go get from dia fans for stadium against Nigeria.

Dem come still anauns how di coach dem of Naija and Portugal go yan with fubol tori pipul on Wednesday abaut di match.

Portugal coach Fernando Santos and one of him playa go yan with futbol tori pipul from 4:30pm for Cidade do futbol and Portugal team go come train for di same venue by 5:30pm. Everibodi go fit wotch di Portugal training for 15 minits.

Naija Super Eagles coach Jose Peseiro go come yan with futbol tori pipul starting from 7:45pm for Estadio Alvalade and den di Super Eagles training go start for everibodi go fit wotch di fest 15 minits of di Naija training.

Portugal wan play Naija make dem for take get idea of how to fit play Ghana wey dey dia group H for di World Cup. Ghana and Nigeria kind futbol resebul.

All di Nigeria playas wey dem invite don land for camp. Na only Victor Osimhen no show sake of say he yan say he injury.

Naija squad na: Adebayo Adeleye, William Troost-Ekong, Wilfred Ndidi, Alex Iwobi, Onyemaechi, Kevin Akpoguma, Oghenekaro Etebo, Duru, Emmanuel Dennis, Paul Onuachu, Ademola Lookman, Bassey, Joe Aribo, Tyrone Ebuehi, Onyeka, Terem Moffi, Chidozie Awaziem, Osayi Bright, Moses Simon, Maduka Okoye, Francis Uzoho, Cyriel Dessers, and Samuel Chukwueze.

Update news