Court for America don sentence Nigeria intanet criminal, Ramon Abbas, wey pipul know as Hushpuppi to 11 years for prison because dem say him use wayo thief pipul money tru intanet.

Di judge wey judge he case come yan say make Hushpuppi pay more dan 1 million dolas give 2 pipul wey him thief dia money with intanet.

Na 2020 dem arrest Hushpuppi for Dubai because of di many big wayo wey he take dupe pipul big money from America, Qatar, UK and oda places dem.

Dem come carry am go US for where dem charge am go court for fraud. Na for dia na Hushpuppi confess say he really plan frauds.

One FBI ofisa Don Alway yan say Hushpuppi na e be “one of di biggest thief wey dey hide money for di world.

“Abbas use him social media take dey popular well well and to take brag with mony wey him thief from pipul tru email business scam and oda 419 wey he do wey destroy many pipul dem life wey him scam,” na so Alway tok.

Hushpuppi confess say him really thief 1.1 million dollars from somebody wey be wan put money make dem build skul for Qatar.

E neva tey wey Instagram remove Hushpuppi account. Document for court show say Hushpuppi pretend to be bank offisa and create fake website to do di runs.

He also confess say him hand dey many 419 runs wey make pipul lose more dan 24 million dollars.

“We no want make anybodi dey use awa app take dey play wayo,dey thief pipul money or dey hide money wey dem thief," na so one tori person for Meta, wey be say na dem get Instagram yan.

“We remove Hushpuppi account because e break our rules,” na so Meta still tok for di statement wey dem make.

Hushpuppi been sabi dey post picture and video well well of di big man life wey he dey live for Instagram. He been get 2.8 million pipul wey dey follow am for Instagram.

Update news