Na Nelson Dafe dey bring dis tori

Giorgia Meloni don make histri as Italy first woman prime minista. Her parti wey dem dey call Brodas of Italy party say dem wan make dem reduce di numba of pipul wen dey cross enta Italy from Africa. Di pipul wen dey run enta Italy so na e dem dey call migrants.

One migrant, Mustapha Jarjou, wey dey stay Parlermo yan say dis period so for Italy dey make pesin fear. " I dey fear well well as dis woman enta power so,because e go affect we wey be migrants here for Italy bad bad," na so he yan.

Jarjou,wey dey 24 years, say Meloni and party go make pipul dey hate African pipul wey dey Italy well well as dem say dem wan dey stop pipul make dem no cross enta Italy.

He come say di wan wey one Italy man kill one Nigeria disabul man, Alika Ogorchukwu, for Italy for August na exampul of wetin him dey tok so.

Na Italy be one of di main place wey pipul take dey cross enta Europe, and sins dis year na 70,000 pipul dine cross with boat enta Italy.

Ms Meloni want make dem make am hard for pipul to dey cross enta Italy because she say e dey make Italy no dey safe and dey affect dia economy.

She want too to dey repatrate pipul from.Italy more and she want make dem make am illegal for any ship to dey rescue migrants wey dey stranded for water wey dem dey enta Italy. Di prime minista still want make Italy Navy block every wia for di sea make pipul no dey cross with boat enta Italy.

But di migrants get one big frend wey be Pope Francis. Di Pope use wan speech wey he give last weekend take defend migrants well well.

He say to dey stop migrants make dem no enta Europe na big nonsense and na sin.

Pope Francis come call di Mediterranean sea,wey pipul dey cross enta Europe "di biggest cemetery for di world. Many pipul don kpai for inside dis water for many years as dem dey try enta Libya.

“Na big wickedness to close door make pipul wey dey hungry no enta house,” na so Pope Francis tok.

Update news