Na NELSON DAFE dey nack dis tori

Rivers state govno Nyensom Wike don tok say di consultation wey he dey make about nexto year election na for make Nigeria beta.

Wike meet recently meet with di presidential candidate of di big political parties for Nigeria wey be Ahmed Tinubu of APC, Atiku Abubakar of PDP and Peter Obi of Labour party for London. Wike come still meet former president Olusegun Obasanjo.

All dis meeting so dey hapun afta Wike quarel with him PDP pipul afta di PDP presidential primary and many pipul dey wonder say which side Wike come dey. But di govno say no shaking, say di meeting dem na sign of beta things for Nigeria.

“Wetin we dey tok about so na for di interest of Nigeria. No be omomo something or something about one man or group of pipul,” na so Wike yan wey him land Port Harcourt.

“We believe say di meeting wey we dey hold so na for di interest of Nigeria. We never decide anything. We still dey tok,” na so Wike still yan.

Wike say nothing go fit stop am make he no save Nigeria from some leaders wey wan turn political office to family business.

“Leadership no be only about you and your business, leadership na for everybody, No be say somebody go rule 8 years as govno, he go come put him son as govno, put him son for national Assembly,” na so Wike tok.

He say him believe say with di consultation wey dey go on so, things go change.

Update news