Na NELSON DAFE nack dis tori

As di June 17 deadline wey INEC give presidential candidates make dem submit names of who be dia running mate don dey near, di mata don full di head of di three main candidates wey dey contest to be Nigeria president next year.

Di three main candidates na Abubakar Atiku of PDP, Bola Tinubu of APC and Peter Obi of Labour Party.

Di pesin wey dey under pressure pass, as tori pipu dey hia, na Bola Tinubu. Him na Muslim and many pipu dey expect am to find running mate from north wey go be Christian because many pipu no go like Muslim-Muslim as president and vice president for Nigeria.

But di rumor now be say na Muslim Tinubu wan still pick as running mate.

Atiku wahala now be say he dey find better pesin wey he go choose as running mate, either for South-South or South East. Him eye still dey to pick somebody for South West wey go fit follow Tinubu drag vote for dat side.

Some pipul wey nia Obi say na Muslim woman from North na e he dey reason to cari as running mate.

“Di tin be say di candidate dem dey find running mate wey go fit help dem win. Dem go get to think quick o because na Friday na e INEC say make dem submit dia running mate name,” na so one pesin tok.

Meanwhile di Christian Association of Nigeria (CAN) don yan say make any of di party dem no bring Muslim-Muslim come out o as presidential candidate and running mate.

CAN National President Samson Ayokunle yan on Sunday say dat Muslim-Muslim ticket go be big kasala for Nigeria.

“Make no party bring Muslim Muslim ticket o. E no go work. E go divide dis contry o,” na so he yan.

Update news