Na NELSON DAFE nack dis tori

More gist don dey come out from di meeting wey APC governors hold concerning di mata of who go be di candidate of di party for di 2023 presidential election.

President Muhammadu Buhari,for di meeting wey e hold with di governor dem,e never too tey, tell dem say abeg make dem let am bring who him want make e be APC candidate.

Tori wey dey be say di governors don hold two meeting for dis mata so and anoda one go hold on Saturday or before Saturday.

For di firat meeting, many of di governors say di idea wey Buhari bring say dem fit try am. Na so one person wey know di mata tok.

He come say for di second meeting dem come dey suggest who go be di candidate of APC.

E say for di second meeting so, north and south wahala come enta as di governors for north say na one of dem suppose be APC candidate.

Di gist wey dey be say na governor of Kogi state Yahaya Bello and governor of Jigawa state Mohammed Badaru na dem dey di northern governors eye.

When one governor from south-west Rotimi Akeredolu come yan say e no clear like dat,two of di northern governors come agree say dem suppose still consider governors wey dey south.

Governors from south Wey dey contest di 2023 presidential election na Cross Rivers state governor Prof. Ben Ayade, Ekiti governor Kayode Temi and Dave Umahi of Ebonyi state.

When dem ask di tori person say what about Bola Tinubu and Vice President Yomi Osibajo,e come yan say di governors only dey consider governors for di ticket.

When Akeredolu come dey tell di northern governors say make dem think of di unity of Nigeria o, di north governors come say ok make dem select two governor from north and two from south, make dem bring dem come out and pick from inside.

Some governors, for di meeting so, come yan say dem deu fear say governor from south no go fit win PDP candidate Atiku Abubakar o for di presidential election.

Update news