Na NELSON DAFE nack dis tori

One woman prison guard kpai herself as dem catch am with prisoner dey run from jail for Alabama for America,na so police tok.

Vicky White (wey be 58 years) die for hospita after police arrest her and Casey White (dem no relate o) as dem been wan escape. Casey White na 38 years im dey.

Di two of dem vanish from prison for April 29. Pipul believe say di two of dem dey follow demself as boyfrend and girlfrend.

Police say when dem see dem last na when di woman do like say she dey carry di man go check whether im head correct for one hospita.

Na Ms White last day for work be dat before she retire. She sell her house e never too tey and come tell pipul wey dey follow her dey work say she wan dey spend more time for beach.

Police say she shoot herself when dem arrest dem and come die for one local hospita.

One officer Sherrie Rick Singleton yan say dia moto crash when police dey pursue dem for Evansville, Indiana. Casey come surrender.

“We don catch on dangerious man. E no go commit from jail again,” na so he yan.

Ms White record as prison guard been dey clean o.

“I for fit trust Vicky with my life,” na so one lawyer Chris Connolly tok. “Anything wey we need for di jail na she we dey go meet. Strong worker na im she be before. Na im make us shock well well.”

Dem charge Casey White for murder last year. Dem say he stab one 58 years old man die.

Him been dey serve 75 years sentence for jail for different bad crime wey he don commit.

E be don first confess say he murder person but later come tok say he no do am, say he get mental problem.

Dem go execute am if court say he guilty.

Update news