NELSON DAFE

Neil Parish don tell BBC say im dey resign afta e admit say e watch blue film 2 times for Parliament.

Mr Parish wey don dey Parliament since 2010 as representative of Tiverton and Honiton in Devon say na “moment of madness” na im hol am when e do wetin e do for Parliament.

He say di fest one na mistake afta im been dey look tractor website but for di second one,he purposely look di porn video.

Im party, the Conservative Party suspend on Friday because of di allegation wey dey im head.

Two female member of Parliament come yan say dem see Mr Parish dey look porn video for im phone for inside Parliament when dem siddon near am.

Mr Parish tell BBC say “di funny tilhing for inside be say na tractor website I been dey look for. I come go enter anoda site wey di name resemble and I come watch di video small. I no suppose watch am. But my biggest crime be say anoda day, I come still go watch di blue film.”

He say dis second time no be mistake and im watch di porn video as e siddon dey wait to vote for House of Commons.

Mr Parish say wetin im do dey very wrong and e go worry am for di rest of im life.

“I wan tell di world say I don make big mistake.”

He say sha di way e take watch di video na way wey be say e no want make anybodi see wetin e dey watch.

“I dey wrong for wetin I dey do but I no watch di video to intimidate women. I din dey Parliament for 12 years and I been get good name.”

Angela Reed wey be di opposition Labour party deputy leader come tweet say: “e dey look for tractors and come end up with porn actors. Mr Parish think say na yesterday dem born all of us.”

For one interview, Mr Parish wife Sue come yan say she dey with her husband gidigba for di mata.

“If you dey vex for every man wey dey watch porn video,many wife no go dey dis world again.”

Update news