Yesterday as I drive dey come from my house for Abule Egba, go reach our garage wey dey near Ikeja under bridge, I no see even one passenger carry.

I reach garage, siddon from morning till afternoon, no passenger show face.

I come siddon dey tink wetin dey happen. So na like dis Naija don bad reach? Abi na all dis Uber, Bolt, BRT and all di orisirisi transport wey don come out make man no dey see passenger carry again?

People no like to dey use dis our yellow taxi again. Na im make I siddon for garage dat yesterday afternoon dey tink which kind business I go begin do.

But e no easy rarara. Na now wey I don dagba finish I go come change di work wey I don dey do for Lagos since before Biafra war? You sef tink am.

Na all dis ting I siddon dey tink wen Mama Kudi wey dey sell agbo for front of our garage come meet me. E come with one sisi like dat.

Mama Kudi say e happy say e meet me for garage, say e wan make I helep im junior sister do someting.

E say im sister name na Bukky. I look di sisi, I see say dis one pass ordinary sisi. If you see as dis sisi take pancake plaster im face, layer by layer. Den come use lipstick paint im mouth pure red.

Eye lashes and nails nko? Dat one long like eagle own.

E no end dia o. If you see di kind clothe wey dis sisi wear, hmm, e for better sef make e waka naked. Tori Olorun!

Mama Kudi collect one paper for Bukky hand, give me. I ask am wetin di paper be. Mama Kudi say na guarantor form.

E say Bukky dey live for Ajegunle before, now e wan come live for Ikeja but di landlord wan make person sign guarantor for am.

I ask am wia di house dey. Mama Kudi point hand for Ipodo. I ask am weda na for Ipodo dey house dey, e say yes. E say na Hotel Afrricana.

I ask Mama Kudi weda na di same mama born di two both of dem, e say no but e sabi Bukky wen e dey sell agbo for one hotel for Ajegunle wey Bukky dey work but now, gofment don seal di hotel, na im make everybody find im way.

I ask am which kind work Bukky dey do for hotel, e say e dey hustle. I ask am which work be hustle. Na im Mama Kudi use low voice talk say Bukky na ashewo. Olorun Oba o!

Na im I tell di agbo woman and im ashewo sister say, if I count three and dem no run comot for my front , make dem no blame me for anyting I do dem.

My broder, dem no wait make I count one sef, na so dem took off.

Make we jam again on Tuesday.

Tank you

Tank you very much

And tank you very, very much indeed.

Update news