Dis life get as e be. Person go work, work, work, e no go get chance siddon for house small.

Na dis our taxi driver work bad pass. Di son of man dey always dey for road 24/7.

If person no work like dat, wia e go see money maintain im family? And me I no ready to put hand for any bad ting to take get money.

Na im make, e dey pain me some times say I no really get time to siddon with my family to see how dem be.

Di ting come be say, my two pikin dem – Bisi and Funke – na woman pikin. And you know say no be moi moi to bring up woman pikin. I swear!

Since wen my second pikin, Funke tell me yesterday say belle dey pain am, my mind jus dey shake like Shakespeare.

And Funke and im senior sister Bisi don jam JAMB after JAMB jam dem for five years. Dem don dey prepare to enter uniservity dis year, wey go make me and Bose be Pama and Mama graduates soon.

Dat yesterday, Funke jus use style dey rub im belle wen e dey eat with im sister for night, e no know say I dey take corner eye dey look am with agbalagba eye.

Small time, Funke run go backyard, nobody ask am wetin e run, lef food wey e dey eat, go do for backyard.

As e come back, e use water take rinse im face and mouth, e say food no hungry am to eat again. E say belle dey pain am. E wash hand, as e wan enter inside house, na im e hold im belle run go backyard again. Tori Olorun!

I call im Mama quick, quick. I ask am wetin dey do im pikin. E ask me which pikin. I say Funke. As a correct Naija person wey must use question to answer question, my wife ask me wetin I see say dey do Funke.

I tell Bose say okay, di assignment wey I give am be say, make e put im eye down and check Funke well well from head to toe, and give me di report tomorrow morning before I carry my guonguoro enter road for morning.

Up till dis time wey I dey nack una dis tori so, I still dey wait for di report.

Make we jam again on Friday.

Tank you

Tank you very much

And tank you very, very much indeed.

Update news