Yawa don gas for motor drivers whey dey like to follow one way and cause traffic as the Lagos state government don set up special squad when dem dey call Anti one way and other traffic offences squad on Monday December 7 in year of our lord 2020

Before now Lagos state government don dey halla about jaga jaga waka of especially damfo or commercial drivers whey they cause kata kata for road like driving for BRT lanes and cause hold up and accident

Commissioner of police Hakeem Odumosu naim form the new bodi whey dem name Anti one way and other traffic offences squad with full backing of governor Babajide Sanwo-olu

Government give the body power to grab and confiscate or arrest any vehicle or okada whey dey follow one way or waka for area whey dem no suppose

Lagos state government don dey vex tiya over motorists wahala plus that of okada riders whey dey use their ogboju style disturb other users

Government order whey come into force Monday talk powerfully say the new Anti one way squad get the power to grab or arrest any Motor or Okada whey waka for one way or for BRT lanes

To show say Lagos government no dey joke, the news group use some okada whey dem don take cause confusion before to show example by seizing them for Ojota, Ikeja and Maryland area of the state.

De New anti-one way group oga patapata when also be commander of policemen for Governor monitoring team, Shola Jejeloye say dem go support other groups like Lagos state Environmental Sanitation Enforcement Agency when Yinka Egbeyemi, a chief superintendent of Police dey lead.

For the Monday waka so, the Anti-One way squad ,also discover one orukuruku house for ikeja where some okada riders when dey always dey against Lagos state’s transport sector reform law of 2018. Den carry different motorcycle from there.

Oga jejeloye draw ear say dem no go treat any traffic offence in Lagos with small pikin hand glove

He say that kind bad road character must stop now. Make you hear watin he talk exactly, “Commissioner of police don mandate us to stop all manner of yama yama and strong head for Lagos state roads . We go do this job without fear or ojoro and we go do am like experts.

So I dey tell all the motorists to obey the traffic laws and they jeh jeh dey drive.

Update news