Corona food: Wahala dey o!

Posted by News Express | 7 April 2020 | 1,246 times

Gmail icon


Na orisirisi tings dey happen for dis Lagos. Even as gofment say make everybody siddon for house, na now plenty tings dey shele pass sef.

We don siddon for house since last week, no work. I jus park my guonguoro for one corner of our compound wey dey for Abule Egba.

Yesterday morning, my landlord, Baba Braimoh send im pikin, Braimoh again make e come check weda I dey house. E say im papa wan see me now, now, now. I tell am say make e tell im papa say I dey come.

Small remain I no wan go see am. I know say money don finish for im hand as e don use all im money play Baba Ijebu for dis Coro lockdown.

All di 4 wife wey e marry join im first wife wey be Mama Braimoh, no one dey work. All of dem dey open mouth wait make month end make tenant dem pay house rent.

Na im make, every month before month even finish, Baba Braimoh go dey use style dey knock door by door, dey remind all di tenant for dis im face-me-I-face-you house, to pay house rent one week in advance.

And we reach like 20 tenant for di house, with only one kitchen, one bafroom and one toilet. Na only me be di tenant wey dey use room and parlour. Di rest na one room, even with dia plenty pikin.

But since dis Coro siddon-for-house show face last month end, Baba Braimoh no know wetin e go do. Who dash am mouth to take ask anybody for house rent?

Na im make I no wan go meet am dat yesterday morning, but na my wife Bose say make I jus go hear wetin di man wan talk.

As I dey go Baba Braimoh side, Baba Braimoh sef dey come my side. Di two both of us jam for corridor.

E say im don dey wait for me since wey I tell Braimoh say I dey come.

E say Councilor tell am say make e come collect food wey gofment share for everybody for our area becos of dis siddon for house. Na im make e wan make we use my guonguoro go carry di plenty food as e be say di food na for everybody wey dey area.

I come talk am for my mind say me sef need di food for my family. I rush go carry my guonguoro key, na so me and Baba Braimoh begin drive go for council.

Wen we reach dia, come see people full like market. And na so people dey fight, dey struggle, dey climb demsef to collect di food.

Wen e reach our turn, Councilor call Baba Braimoh, carry one bag wey dem put stamp for body, give am.

Di Councilor say na di food wey gofment say make dem give people to take shock belle for dis Coro shutdown. E say di money wey gofment don spend for di food pass N100m for only dat our area.

Baba Braimoh tell Councilor say we bring taxi come make e for carry all di food wey dem wan give us to share for our area. Na im Councilor talk say dat one bag wey e give us so, na for everybody for our area.

 I use style look wetin dey inside di bag. I see one chechere bag of garri, anoder one for beans and rice, den one bread. Everyting wey dey for inside dat bag no fit belle full Baba Braimoh family sef, not to talk of di hole area. Olorun Oba o!

I look Baba Braimoh, Baba Braimoh look me. Na im we drop di bag for ground. We tell Councilor make e carry am, join im own, take am go feed im family.

Na so me and Baba Braimoh begin go house.

If na dat one be di N100 billion food wey dem dey shout upandan for television, I no want am. Make dem chop am. Me and my family no go peme, corona food or no corona food.

Make we jam again on Friday.

Tank you.

Tank you very much.

And tank you very, very much indeed.

 


Source: News Express

Readers Comments

0 comment(s)

No comments yet. Be the first to post comment.


You may also like...