Love medicine for sale (3)

Posted by News Express | 16 November 2021 | 456 times

Gmail icon


I tell di madam wey come our garage with big Ghana-Must-Go bag say na me be di one and only Oga MAT, any order Oga MAT for dis hole world na fake. 

Wen di madam body don calm down, I come tell am my price, e gree. E even tell me say e ready to pay any amount as e be say na me carry am. E say wen e reach house, e go tell everybody plus including all dia nebor, church member dem and village people say na Oga MAT carry am for im guonguoro today.

Na so we begin go Akoka for Yaba o.

We no even reach Maryland wen di madam ask me wetin di Oga MAT. I tell am say Oga MAT no be my real name, say na people give me di name tipe tipe, becos dem believe say no corner for Lagos wey I no sabi as taxi driver.

I tell am say di name wey my papa wey born me for my village for Ogbomoso give me na Olufemi, or Femi for short. 

I tell am say my full name na Olufemi Olurotimi Olugbemiro. But everybody for Lagos dey call me Oga MAT. I tell am say Oga MAT mean Oga Man About Town. 

Di madam come laugh sote e nearly forgot say we don reach Akoka for Yaba.

I ask di madam which school for Akoka we dey go. E say na dat big school. For my mind I know say na di uniservity. So I drive enter di school gate.

Wen we reach, e say make I drive go hostel side wey sisi dem dey.

As we jus park, di madam call im custormer. Di sisi run come meet us for inside my guonguoro. E ask di madam weda e don bring di market. 

Madam open di Ghana-Must-Go bag, as di sisi jus see di orisirisi bottle wey full inside di bag, na so e run go back for hostel. Before I open my eye, school sisi dem don full for di place we park.

(To be continued)

Make we jam again on Friday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...