See as soja take gun finish Jimoh (2)

Posted by News Express | 17 September 2021 | 778 times

Gmail icon


I no even allow di bobo wey call talk finish for phone. I tell our union member dem wetin shele, wetin dem say Soja do our union chairman Jimoh for Ojuelegba.

Na so all of us jump inside our different taxi and move to Ojuelegba. If you see as we drive for road, you go tink say all of us don craze.

Wen we reach Ojuelegba, come see crowd! Dem dey look Jimoh wey dey inside gutter.

Na so all of us rush go hold our union chairman for inside gutter. We check, tank God say e still dey breathe small. But we see big wound for im head as blood dey rush out.

We hear say na Soja beat Jimoh, take yansh of gun hit am for head, na so Jimoh fall inside gutter.

We rush Jimoh go General Hospital. Tank God say Jimoh no peme.

Up till dis time wey I dey nack una dis tori so, nobody tell us wetin Jimoh do dat Soja wey nearly kill am. And Jimoh never still fit open im eye and mouth for hospital bed.

We don go report di matter for olopa station, and we dey plan to organise all our union member dem for Lagos State, make we do protest go meet Soja oga for army barrack tomorrow.

Wetin sef? If all dis Soja dem don craze, make dia oga carry dem go Yaba Left a.k.a. Aro. 

Na only dat gun wey dem carry dem dey take chance people. Make dem carry dia gun go face dia mates for Sambisa forest, na lie.

If na only dat dia uniform, dem no fit face us. After all Abami Eda been don talk am say, uniform na clothe and na tailor sew am. 

Make we jam again on Tuesday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...