Helep! My wife Bose don start anoder wahala (3)

Posted by News Express | 22 June 2021 | 856 times

Gmail icon


Bose come talk say, im friend come house yesterday wen I don go work. 

I ask am which im friend, e say Paulina. E say if I see di kind phone wey Paulina bring come. E say di phone name na iPhone 7. E say noting for dis world wey di phone no dey do. E say Paulina tell am say e buy di iPhone 7 N350,000 only.

I tell Bose make e go straight to di point.

My wife come tell me say di torch light chinko phone wey e don dey use since 2001 dey shame am now. E say e wan buy iPhone 7.

I no know wen I shout, Olorun Oba o!

So, wen I go my work, dat Paulina wey don run comot for im husband house, lef dia four pikin, dey come dey tell my wife to buy iPhone 7?

And na dis same Paulina tell my wife say e don see dat oyibo night duty casino work for am o!

Di way I vex dat midnight ehn, if I no control my body, di ting wey I for do Bose, hmm, di hole world for hear am.

Di ting wey I do be say, I tell my wife say I dey come, make I go piss for backyard.

Na im I use style go knock our nebor Yemisi door make e open for me. I tell Yemisi make e no vex, say I wan sleep for im room till day break. 

Yemisi ask me wetin happen for my own room, I tell am say make e no worry, I go tell am for morning.

Na me and Yemisi lie down for di 6 inches bed wey dey im room. I dey hear as Bose wake Bisi and Funke up, say make all of dem dey find me, weda dem don come kidnap me. I jus dey laugh. 

I come talk am for my mind say monkey don jam banana today. Yemisi, di only sisi wey be tenant for dis our Baba Braimoh face-me-I-face-you house, wey don dey find how e go kidnap me tey tey. 

My broda, na from Yemisi room I comot for early morning begin rush go our garage wey dey near Ikeja under bridge. I switch off my torch light chinko phone.

Up till dis time wey I dey nack una dis tori so, Bose dem still dey find me.

Make we jam again on Friday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...