My guonguoro no be ambulance, abeg! (3)

Posted by News Express | 10 July 2020 | 586 times

Gmail icon


I tell Bose say I don dey go, I no fit wait for am again.

My wife come begin beg di people wey don line up to baf, e say make dem allow enter next turn, dat e dey in a hurry. Nobody even answer Bose sef. And my phone still dey ring dey go.

I tell Bose say if e no fit follow me like dat, make e no worry, make e get patience wait for im turn to baf. And after dat, make e enter Danfo go di Oyingbo market.

Na so I rush go outside. As I jump inside my guonguoro, close door and wan open ignition, see my wife don dress up finish come open passenger door for front and enter.

Bose say which kind yeye baf be dat dis early morning wen be say na market e dey go and e go still baf wen e come back. I no even mind am.

If you see di kind drive I come dey drive to meet up with di contract appointment with Mr. Banglovish, you go pity me.

Tank God say no Go-slow for road dat early morning. Na so my leg jus dey match di trottle dey go. Bose shout tire, I no wan hear.

Before you know sef, we don reach Onipanu, Fadeyi, den Jibowu wey my wife come down to take Danfo wey dey go Oyingbo.

As I reach Yaba bus stop, my torch-light chinko phone begin ring again. I pick am. Mr Banglovish ask wia I dey, I tell am say I dey for Yaba bus stop.

E say im jus comot for dia now, as e don call me tire I no gree pick.

Mr Banglovish come dey direct me how I go take reach im office for Yaba left.

As I reach di gate of di place, I come see say everybody for dia wear overall, hand cloves, and cover all dia face like people wey dey go moon.

Di next ting be say, one bobo like dat wey also dress like di order people, waka come outside di gate. E come wia I park and ask me weda na me be Oga MAT. I say yes. E say okay, make I wait for all di motor wey dey load inside to come out, dat e go soon reach my turn to load.

I ask am which kind load I go carry.

Na dat time I sabi say na Coro people isolation center I dey so.

Na dat time I sabi say na dead body dem I wan load for my boot take go burial ground at N1000 per dead body.

I tell Mr Banglovish say since e never reach my turn to load, make I run go petrol station go fill my tank and come back kia kia for di contract.

My broder, na so I took off till dis time wey I dey nack una dis tori so. And I make sure say I block Mr Banglovish number for my phone.

Who tell una say my guonguoro na ambulance?

Make we jam again on Tuesday.

Tank you.

Tank you very much.

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.


You may also like...